راكب اللي لامشى كنه أمير
ايتباهى ويتغنّج في فخر

أقصد الفكسار ليش إنه خطير
موترٍ بين المخاليق اشتهر

من قبل قولي تمثّل به مرير
ووصفه فرحان بأبيات وشعر

وارد اليابان صنّاعه خبير
يقطع أميال ومسافات ووعر

في مزاياته وفي شكله مثير
معجزة يابان إبداع وفكر

لمع زيكه كنه السيف الشطير
في يمين الشمري يوم الظفر

يوم يقبل مثل موسى بن نصير
وإن تقفيته عقيدٍ منتصر

أفنس الخشه تكل خشة بعير
عابسٍ وجهه تكل ضابط خفر

أبيضٍ لونه مثل سن الغرير
أو ذكر بطٍ على ضفّة نهر

كشنه الديباج وأسلاك الحرير
مقعدٍ طبي وتكّاية ظهر

والسيور اللي تدور وتستدير
كن توحاّبه صدى نايف صقر

لانوى الممشى وعزّم بالمسير
وش يسوّي الرنج عنده والهمر

مايدوّر به بدل شخصٍ بصير
ولاقناه إلاّ فطينٍ مقتدر

كل حاجه تستشير ابها شوير
ماعدى الفكسار لو عندك نظر

لنّه المجلوب للدرب العسير
لنّه المطلوب بدروب السفر

مايطقّه كل محتاج وفقير
ولامسح كبوّته الوجه الودر

مركب شيوخ وهوامير ووزير
والضعيّف يفرك ايدينه قهر

لاعطاه القاز سوّاقه يطير
واعتقد لوله جناحاتٍ شهر

نيزكٍ يقشع دياجير وهجير
مثل ماكوك الفضاء يرسل شرر

سايقه حرٍ من ربوعي جدير
من ضنا الهيلا طويلين العمر

انطلاقة رحلته تلعة زرير
ومدرجه حايل وشمّر يابشر

الطنايا فيهم أبياتي تحير
كيف أوصّف مفخرتهم في شطر

شمّر أهل الرمح والسيف الشطير
تقطف أرقاب العدى قطف الثمر

محتمين الدار لاصاح النذير
لابسين الطاس والجوخ الحمر

للمعادي حنظليل وزمهرير
وللموالي يوس فندي وزهر

تكرم العاني وتفزع للقصير
تنصر المضيوم وتدوس الخطر

من زبنهم ينعم ويصبح بخير
ومن تحداهم يبي ينطح صخر

كم عقيدٍ منّهم عوّد كسير
وقام ينطي ربعه دروس وعبر

وياصلاة الله عدد ماطار طير
للرسول اللي فدى الدين ونشر


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر