عروس الشمال

لـ نايف العبيد، ، في غير مُحدد، آخر تحديث

عروس الشمال - نايف العبيد

يستريح القلب لاهبّ الشمال
وينشرح صدري اذا شفت الجبل
بين أجا وسلمى مشاريف الجبال
اجتمعنا في دجى ليل(ن) هشل
ليلة(ن) ماهي مثل باق الليال
رفرف الخفاّق والكل إحتفل
ودامهم أعطوك ياشعري مجال
انتهض مثل الأصيل إليا صهل
بسرج أمهار القوافي بإبتهال
وانظم القيفان والشعر الجزل
إيه أعرف إنّك هبالٍ في هبال
ان طغيت أنهيت كل غث وهزل
تِسكر عقول(ن) وتودعها ثكال
وكم صميّدع من تبهلالك زِِمل
إيتنّحى من تذمّه بإنعزال
ومن تبيه اتوّصله كوكب زحل
طال ليلي والعنا والشوق طال
وغير حايل ما ملأ عيني مَحل
دار حاتم طي وقروم العيال
منبع الأخيار في ذيك الُطلل
مارأت عيني مثل زينه جمال
ان رضى منّي عذولي أو زَعل
صيفها هايل ومرباعه خيال
وجوّها ياناس يفتلني فتل
وماالوم اللي تغنّابه وقال :
صوب حايل قلبي العاشق رَحل
ياسقى الله يوم غناّبه طلال
مالت اعذوق البختري والنفل
ديرة الأجواد وزحول الرجال
جودهم غيث(ن) تهامل وانهمل
ديرة أهل الطيب مافيهم جدال
طيبهم ديم(ن) على الوادي هطل
الله يغيثه من مزون الخيال
وترتع بغدرانه أجوال الحَجل
وعشت ياسعود السعد واف الخصال
يالأمير اللي على العليا نزل
كامل الأوصاف ولله الكمال
ضاري(ن) ساطي وزيزوم(ن) عدل
حنضل(ن) حلتيت بحلوق الحثال
وللهجافا فيّ وظلال وسهل
ارتقى بحايل طناطير(ن) عوال
قادها للمجد وكل سايح ذهل
يامعدّيها مراقيب(ن) طوال
ياهلال(ن) هل في حايل وحل
العرب لاشبّهت تضرب مثال
وانت ماتوفيك أمثال وجمل
السموحه دام أوجزت المقال
اشهد إن الشاعر ابوصفك بحل
قد سمعت ابمامضى حكمه تقال
خير قول المرء : ماقلَّ ودل ؟!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر