من لا يعرف العلم غادي

فهد يقول الصبر فالامر نكال
واقول من لا يعرف العلم غادي

الحر الاشقر لو نوى الصيد ختال
ولا ياكل الا من كبار الثنادي

ولا نيب من بعض الموقيف محتال
ولاقط همت بغي تسعين وادي

اعرف شخوص الناس في كل الاحوال
واعرف صليب الراي غير الربادي

عمري وعايشته بالاقفا والاقبال
وعلى الله الوالي ذخرت اعتمادي

وخذت فالايام شده ومنزال
وان نمت الاصبع فوق راس الزنادي

ماهيب لي تاوي ولاهيب تنحال
دايم وتضرب بالبياض السوادي

قبلي رجاجيل على مر الاجيال
ما حصلو غير المنيه معادي

والناس فالدنيا ترى الوان واشكال
لو شفت وسط السوق جمع وفرادي

فيهم خبيثين و مناجيس وانذال
اخبارهم تكسح جميع الروادي

فتاقة الاعراض سراقة المال
هل النمايم مفسدين العبادي

رجالهم وان قام فالامر لازال
بشذب القفا يقدح زناد المعادي

وهو لا والله بالنقا مشفق ذال
ولا يقطع الخرمه بصبر وجلادي

يقصر عن علوم المراجل ولا طال
فالدرب له ممشى مهوب امتقادي

ولولا ضعاف العقل ماشاخ الاذيال
ولاطاح من ظهر البعير الشدادي

ورجل بسوق المرجله دون واحثال
وان نقص مقداره فلا قيل زادي

نازل على جرف ليا ديس ينهال
في لذة الدنيا خوي كل رادي

وبه رجل لا جيد ولا هوب بطال
مجنب وعند القوم رايه حيادي

بغابته ما ينفقد بين الازوال
ولا عروضوله فالامور الشدادي

وبه رجل معرفته على الكبد سلال
نشبه وعلى شره يصيح وينادي

ولا كل من يلبس لك البشت رجال
بعض الثياب امسترات العبادي

اهل الشرف ميزانها ما ذكر مال
راع الردف ماهوب راع الشدادي

يقطر سحاب الطيب من كل رجال
اللي له اسلوم المراجل مبادي

لا ما يجي قدم الرفيعات بحّال
ماتصفي الا لوجه قرم ريادي

اللي ليا حطو ثقيلات الاحمال
افعاله تجي من قبل صوت المنادي

وانا احب اهل المعرفه رجال وعيال
واهل السنع فالطيب لي خير قادي

احبهم واحب اللي لهم ذخر وظلال
وابسط لهم بالطيب كل الايادي

وافرح ليا لمّوا علي كيف فنجال
وسوالفٍ تطرد رماد السهادي

مافيهم اللي للرديات شيال
ولا دق راع الهرج يمهم هوادي

وان شفت منهم عيب ماجيت عيال
ادمح مزل العيب وارقى سنادي

وبادر الزعلان في وسعة البال
ولا رد غير اني موكد مرادي

فالعاقل اللي ماخذا الهرج بعجال
مطاوع الهرجه يسمى مهادي

والميز ميزان العوارف والابطال
ولا كل رميه وسط مرمى جهادي

وللهرج مخرج كان للهرج مدخال
ومن يزرع الحنظل مفلس وغادي

والزند مقداحه يبي يشعل اشعال
وتشب نار فوق راس العنادي

والا انت ما تحتاج ياطيب الخال
حر مجرب في صباح وهجادي

صميل قيض يتقى بشهب اللال
الله علم في منزلك بالفوادي

غالي ومن غالين ياذرب الافعال
واعنز عليك اليا بغيت الرشادي

ويد بلا الاخرى فلا هيب تشتال
وانته سنادي كان قل استنادي