مفتاح أمرنا

انا خوفي الايام تبعد نجوعها
عاد يمدينا نرجع نفوعها

الا فاتت الفرصه على طالب العلا
نفسه على مافات منها يزوعها

كثر الصياح وضاقت الارض بالزعل
والناس من ماصار ملت سموعها

ولا طال وقفتنها هذي وش يسرنا
لا نامن الدنيا ونصبح بروعها

الى متى واحنا نحاسب نفوسنا
حتى انها شانت علينا طبوعها

رحنا على قل الزلل نبحث الزلل
فرقنا توحدنا على قل جموعها

وصرنا شتات احزاب ناس تقودها
متلبسه في طبع ماهو طبوعها

تدفها في تيهة الغي والجهل
ومحملات الشر يمنا تصوعها

وحنا قليلين العدد سابق العهد
فينا على رفعة بلدنا وطوعها

لاننحرف عن قاطر الحق ساعه
ترى الردى ساعه خطير وقوعها

واليا اختلفنا ضاع مفتاح امرنا
تشمت بنا الاعدى وهي في ربوعها

واليا اتفقنا يجزع ابليس لا سمع
عند الصلاة ادعاتنا في ركوعها

فيقوا وخلوا داعي الشر لا دعى
دعواه يبطل شكلها قبل نوعها

من وقضة الفتنه يبي يرهي الحطب
حتى يذوقنا مرارة فجوعها

واما انتبهنا ما سلمنا من العطب
حت الورق والزرع ماتت فروعها

والدار ياهل الدار لا نرخصه أبد
قدام نشرب من مرارة فجوعها