كيف بعت الحب و العشره بعد ما كنّا ؟

كيف بعت الحب و العشره بعد ماكنّا ؟
قلب واحد والوفا كنّا نصون عهوده

كيف تتركني مع الهوجاس دوم معنّا ؟
عايش ٍ جسمي وروحي للأسف مفقوده

أنظم القيفان كالمجنون بك وأتغنا
ياوجودي وجد من خله مبيح سدوده

لو يطول البعد أنا وافي معك وأتمنّا
شوفتك تسوى بقايا عمري المعدوده

عاشقك مغرم وللجيّه ترى يستنّا
لا تطوّل بالغياب ولا تزيد صدوده

إلحقه من قبل عقله لا يصيبه جنّا
ثم بَعَدْها هات من يقدر يفك عقوده

لو نشدت القلب من لجله يزيد الونّا ؟
جاوبك ثم قال ماغيرك يفت عضوده !!

بنشدك قلبك علامه كالحجر ماحنّا ؟
كيف واللي عاشقك قلبه هواك يقوده

لو طلبته بالهجوم يشن حربه شنّا
ويش عنتر قدم من حبك يجي مجهوده

لا عشقنا فالهوى كم ياحبيبي صنّا
نرخص الأرواح مانعرف طريق العوده

مانخون العهد لو تنشد وتسمع عنّا
نوفي الميثاق ودروب الغدر مسدوده

لو تهين الحب وحقوقه ترى ماهنّا
ما تعودنا نهين و للغرام حدوده

روح جعلك مع عواذيل الهوى تتهنّا
ثمّ لا ترجع على قلبي عشان تزوده