هبوب الشوق - فيصل بن عويمر

هبت هبوب الشوق في قلب مغليك
ولاحت بروق الدمع ساعة ذكرتك

هلت دموعي عند ماحل طاريك
ابكي من الفرقا وانا ماخسرتك

لاهزني نود المعاني اغنيك
اكتبك في شعري وانا ماشهرتك

تاخذني الذكرى على حلو ماضيك
واراجع اللي فات لو ماقدرتك

كن المشاعر ودها بس ترضيك
وكني من احساس المحبه غمرتك

امر بيتك كل ليله ولاجيك
ارتاح لامريت لو مانظرتك

صوبك خذاني شوق من قلب يغليك
يزرع بذور الحب لو ماثمرتك

في غيبتك صوت القصايد تناديك
وانا من صدوف الليالي عذرتك

اجاهد الذكرى اذا مر طاريك
ياللي على شح الليالي ذخرتك

رحت المكان اللي تواجهت به فيك
وهليت دمع العين ليل ٍ سهرتك

هزتني الذكرى من الشوق تبكيك
دمعة غلا فالعين بس مانثرتك

© 2024 - موقع الشعر