موقف

الموقف اللّي حداني للعنا والعتاب
بيّن لي الّناس طيّبها من رخومها

ماكنت أحسب الهقاوي ياردنّي سراب
يالين شفت الصّداقه تجحد سلومها

مدّيت كفّ الرّجا من صوب ناس ٍ قراب
والطيّب اللي الحاجه ماقضى لزومها

ظنّيت لاضاقت الدّنيا حوالي ذياب
وأثره صحيح المواقف مات زيزومها

كذا عرفت الحقيقه ماكساها ضباب
انّ الصّداقه فلا تغنيك في سومها

ماهو صحيح الوفا والطيب مايوم غاب
عمر اللّيالي ماتضحك عند مضيومها

في هالزّمن من يقول ( الوقت خلاّ صحاب )
كل ٍ يدوّر مع الايّام مقسومها

عمر الزّمن مايجامل لوّه الحظ خاب
كنّ اللّيالي انا واحد من خصومها

إيقنت إنّ اللّيالي طولها للعذاب
وبرد الشتا يذبح الاحلام من يومها

والضّيق والحزن كتمه مصدر الاكتئاب
مثل الزّمن واللّيالي ضاع محرومها

ماهو تفلسف وانا قناعتي في خطاب
(( جور الزّمن والليالي يجبرك صومها ))

ودام الاماني كبيره واللّيالي ب ناب
لابدّ أصبر على الدّنيا مع سمومها

يمكن تمّر اللّيالي والاماني سحاب
في غفوة الوقت يمكن يمطر غيومها