غلطة أيامي - خالد المخيدش

يدور الوقت والدنيا تبي تكشف لك الأوراق
بلاش من الدموع ومش عينك يامبكيها
 
أنا ماني لعوب ٍ لأجل أدور من زعلك فراق
ولاتأثر علي ناس ٍ تناحيني وأناحيها
 
صحيح من الشقى ضايق... ومن كثر الجفا مشتاق
ولكن عزتي تفرض علي أحشم مباديها
 
أنا لي قلب لامنه عشق يغنيك عن عشاق
ولي نفس ٍ إلياضحت تجود بكل مافيها
 
عطيتك من غلاي ولاكسبت ألا شقى وأرهاق
وعيني للسهر ومقابل طيوفك معنيها
 
وقلطتك على زود الغلا وتحفي الأشواق
وبهرت الحنايا بالوفاء لك بكر وأثنيها
 
وجزيت الطيب مني بالجحود وخونة الميثاق
ألا ياغلطة أيامي حرام النفس تشقيها
 
تزيد الضيق فيني وأنت شايف صدري اللي ضاق؟؟
تصد وتتهمني بالخيانه وأنت باديها؟؟
 
صبرت أدمح ولو أن الصبر مرات ماينطاق
وأعدي... بس لاجت للكرامه ماأعديها
 
خلاص الشمس غابت عن سمانا عقب طول إشراق
توكل وأنس عشرتنا من أولها لتاليها
 
أبي تبعد عن دروب النقا مادام لك منطاق
ورجلك في دروبي عقب صدك لاتسريها
 
صداقات اللعوب تسبب الخذلان للخفاق
وأنا أحمد الولي يومي منزه عن مماشيها
 
رضيت بدبرة المولى وفي تقسيمة الأرزاق
ونفسي دون درب الكايده ماني بثانيها
 
ورثت الطيب وأبخص سلعة الكذاب والبواق
وأسوم الطيبه وأسوق قيمتها لراعيها
 
يلوق العلم وألا ياعساه لحضرتك مالاق
أبرحل وأترك الذكرى معك ماعدت باغيها
 
ويدور الوقت والدنيا تبي تكشف لك الأوراق
وتبي تندم وعينك ماتفيدك لو تبكيها
© 2024 - موقع الشعر