السجايا الفاضله

الرجل لا منّه بغى عز نفسه
المرجله يرقا بعالي قممها

في الطيب والشيمه وجزل المعاني
يشيل بيرقها ويرفع علمها

كل السجايا الفاضله يهتويها
ونفسه عن دروب المذله فطمها

كم من عزيز لابغيته لقيته
يفز لك وليا ندبته فهمها

وكم من صديق جاهل مايفيدك
تبغى المسره مير يوْلِع فحمها

راع المكارم والوفا والحميه
مهوب مثل اللي تردت ذممها

ابشر بعزك في ظروف الليالي
تسعد بفعل نادر من شيمها

في كل معنى طيّبٍ للجزاله
تلقاه ثابت فوق عالي هرمها

الطيب والمعروف مبدا طريقه
وكل العلوم اللي تنومس حكمها

ولا ترتجي من حاقد علم غانم
ولا تقرب الحيه ولو ربط فمها

واللي يعزك لا توريه سيّه
رد الجمايل يافتى واغتنمها

ولا ضعيف النفس ماله مكانه
نفسه ضعيفه مايعالج ورمها

أنا اشهد إنه عالةٍ في حياته
ماكل من يبغى الشكاله لزمها

الدين والتقوى رموز السعاده
وأخلاقك وطيبك يزوّد هممها

الطيب بين في رجال الشهامه
يبين للغالين مركز كرمها

أبوك له طاعه وتقدير واجب
ودوّر رضا أمك لو تقبّل قدمها

واخوك عزك لا جفتك الليالي
واختك على طول الزمان احترمها

آخر كلامي قلت جملة معاني
أبيات من شاعر حكيمٍ نظمها

وصلاة ربي عد رمل الذواري
على نبيٍ سن حجّة حرمها