فن وكيف

لـ حمد بن فطيس، ، بواسطة غادة العلوي، في غير مُحدد

فن وكيف - حمد بن فطيس

انا ماني بحول للحمامة كون عقب الشين
الى مني دريت ان هاالخلاويّة خلاويّة

انا ماني على البرقه زهوف وكلمة التلحين
إلى من شفت من تبدي شكاويّه شكاويّه

انا اقرنس بفضل الله من الذرعان والكفين
احوم بجو وانظر من علاويّه علاويّه

انا مااهتم لا كثر المماسح من غراب البين
انا ارقا فوق ولا هو حراويّه حراويّه

انا ادفع كاش لهل الكاش والبعدين يابعدين
ابو بعدين ماتلحق مناويّه مناويّه

يقولون الفقر بيّن مع من بيعته بالدين
وانا اعطي كل من زادت هقاويّه هقاويّه

انا ادري كل سرٍ ما يذاع ان سار بين اثنين
واعرف ان الطريق اصعب ملاويّه ملاويّه

إلى شفت العقول الراجحه من بين حين وحين
عرفت اشقومها روس الشقاويّه شقاويّه

اسل السيف فن وكيف واماري بابو حدين
واعرف ان كل الايمان الرهاويّه رهاويّه

مع اهل الصف الاول ما تعيّني مع التالين
نعمت ابدار..والدار السناويّه سناويّه

ويعجبني فقط لونين ..ماني بارغب التلويين
نهار وليل..والاريا السحاويّه سحاويّه

اعوّد للقديم ولاجهلني عيشتي بالفين
ولا بشمت واعرف ان الجلاويّه جلاويّه

ولاني بالتفت في راعي التهويل والتخمين
ولو هي متقنه تبقى السماويّه سموايّه

ابعد خطوتي والاّ قصير الشبح ابو مترين
يروح..يرد..ويتبّع.. خطاويّه خطاويّه

صدور الناس ديواني ولا يحتاج له تدوين
انا وش جبت لاقلت النداويّه نداويّه

الى شفت الردي يبغي يروح ايسار رحت ايمين
اخليها..تجاوبها ..غطاويّه غطاويّه

انا ماني وابو وجهين يامحمد بخشم وعين
ابو وجهين ما غطّت بلاويّه بلاويّه

انا شبحي يابن علوش مع شرواك عقل ودين
انا ادري كل مطلوب الهواويّه هواويّه

انا ادري بندق الفتنه لها روح ولها روحين
وعلى الدم الشياطين الشفاويّه شفاويّه

ابعّد خطوتي عن كل دربٍ فيه جيم وسين
وخرج المعرفه تربط عراويّه عراويّه

انا اعرف وين اوجه كلمتي لاسار زين وشين
لها باختار من تطلب عزاويّه عزاويّه

انا ويّاه في حلفٍ من السابق ومن ذالحين
انا ويّاه لو ماحن دناويّه دناويّه

© 2024 - موقع الشعر