اخر زياره

لـ حمد بن فطيس، ، بواسطة غادة العلوي، في غير مُحدد

اخر زياره - حمد بن فطيس

يامن لفت باقصى الضماير مطاياه
حل وعمر باقصى الضماير دياره

اقبلت له يوم الوفا من سجاياه
وازحت له عن كل خافي ستاره

عطيت واستقبلت من مد يمناه
يوم الحصاد اللي تزاهت ثماره

ارخصت له كل الغوالي لعيناه
صنت المحبه صون بنت المحاره

يازين ذاك اللي مضى ما نسيناه
وقت الغلا يا زين ذيك الجساره

اخفض جناحي له محبه وجرّاه
الى زعل ماهو يطول انتظاره

ايلين شك اني مليك وتولاه
بامره وحده من يمينه يساره

جاني على غير العوايد من اقصاه
مثل الغشيم اللي يطوف الاشاره

لا والله الا غيّرته المباهاه
عند الصديق وعند نفسه وجاره

صديقه اللي غيرته من سواياه
يبغي دمار اللي بناه ودماره

ما كنت اعرف انها قبل من مزاياه
ليّته تريّث واستخار استخاره

لو هو درا انه خادعه واكبر عداه
ما اوحى له ان الصد فن وشطاره

ما قال باعد وانكر الحب واجفاه
تاره وبيّن جانب الحب تاره

زد في دلالك واذكر الحب وانساه
خلك تفنن في الغرام ابمهاره

خلك وسط ما بين عجفاه وقداه
واتبع له اذواق الحلاوه مراره

من عقب ماهو لي صخي بعطاياه
هّدم صروح الحب باخر زياره

لا واخساره حبنا اللي بنيناه
واكثر مشاريع المحبه خساره

اللي حصل مقبول لو ما اتمناه
ما دام هذي رغبته واختياره

لو كان له قيمه ولو كان له جاه
يسري بليله لين يطلع نهاره

يدري على قفايّته ما تبعناه
وادري مصير الحق يجلا غباره

اقفا وانا قفيت والله يرعاه
والقلب يخلط عزته وانكساره

ابعدت مثل الحرف لا فارق شفاه
ثم ضاع باحضان الفضا في العباره

ماهو بفرض اني على طول وياه
الكل منّا عز راسه شعاره

لو كان من راسه الى حد ماطاه
زينه يزيّن خطوته في مساره

ماني بمتجاوز خطاياه لرضاه
لو كان هو عندي وقاره.. وقاره

اخير من همي على قل لاماه
ممساي في راحه براس الزباره

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر