العوسج

انا آقف للصديق وللرفيق وللخوي ..واجير
اوقّّف له الى اقبل لي واعاني من معاناته

انا مثل النداوي لا تضايق من مكان ايطير
تعجز البومه اللي في الخرابه عن مجاراته

انا ما اشره على بعض الرجال اللي علومه غير
يلّونها على حسب المزاج وحسب رغباته

تبعته يوم هرّول لين شفته في الطريق ايسير
عرفت اقصاه قبل اداناه واسراره وغاياته

انا من سنحته وحكاه يوم اقبل هقيت ابخير
احسب السر يلحق..واثر فيه اسرار مواته

يشوفونه تحت هيكل تمدّّن والفواد اكبير
خساره كان هو ما يتّخذ كامل قراراته

اذا ما للرجل فكر ايتقدا به يسير ابعير
يحدّر مر ويسنّد على كل اتجاهاته

يحب اهل المصالح والفقيّر في نظرْه اصغير
على صهوة نفاقه قام يظبطها حساباته

بليا ظل يالعوسج ولا يوكر عليك الطير
خساره يالندى اللي بلل اوراقك بقطراته

انا ما اعمم المعنى ولا ني باعرف التشهير
لسان الحال لو هو ماتكلّم ما ابلغ اسكاته

ولكن قلتها له هكذا والمقصد التذكير
لعلّه او عساه اتبيّن الحكمه مهاراته

نصيحه ..والزمن في ميلته ما يعرف التبرير
اذا يضمن بداياته فمن يضمن نهاياته

علامه كيف ما يصمل وش الحاصل وش التقصير
علامه ما اظهر الوجه الطويل وحل مأساته

اذا سار السبب واضح فلا يحتاج له تفكير
واذا سار السبب غامض يشك الرجل في ذاته

ولا به سر يبقى سر لوانه بجوف البير
ولا يعرف صواب الهرج لامن كثروا ارواته