( حرب الأباده) - شبيب النعيمي

ياهل الطيور مبعدين المراويح
ياللي لكم فالبر والصيد راده

سهيل بيّن وأرزمن المراويح
والنود عقب القيض ذعذع براده

والجو زان وزان وقت المساريح
وكل(ن)يجهز يانشاما عتاده

من فوق مايدني بعيد المشاويح
طرزه جديد ومركب أهل السياده

من مصنعه صمم لبوج الصحاصيح
ومن مصدره صدر ومعه اعتماده

شفي اليا انحن النجوم المدابيح
اليا اهتنى للنوم راس الرباده

تله على خط(ن) تعاوى به الريح
مسراه طول اللي مامن هواده

ينصى الفياض اللي بها زايف الشيح
قفر(ن) عليها الوسم هل القلاده

فيها الزهر يلعب معا الريح ويريح
والورق تسجع فوق غصن الكداده

والربد فيها ممسيات ومصابيح
تدارجن بشعابها والحماده

ومعنا الحرار الصارمات المشافيح
اللي لهن صيد المخاريش عاده

كل اشقر(ن) بالفعل كنه شلويح
عوق العنيد اللي تزايد عناده

أشقر نحر ماخذ من الثلج تلميح
كن البياض بقحف راسه ضماده

صافي ضهر وموضح الريش توضيح
لون البرد لونه ويكشف زياده

طوله بعرضه والمناكب مشابيح
متقلط الثنداه كنها الوساده

ومنسر جليل(ن) والمناسم مطافيح
وعين(ن) بها جمر(ن) تزايد وقاده

كنه الى اطلع وانتهض عقب تمريح
(عنق الحنيش اللي يهاوز جراده)

كن وفقته رجلن على الجمه يميح
ضافي شليل وجل ساقه سناده

هو السند يوم الهدد والتماديح
طير السعد يوم اللزز والجلاده

لاجا نهار(ن) فيه للفعل ترجيح
ياهل الطيور القول يبغي وكاده

الخرب قدم عيونكم يالزحازيح
روح يضف الريش جل اجتهاده

(تسعة طيور(ن) عندكم روّحت ميح
مافيهن اللي يستحق الاشاده )

من عقبها قالو معاك التصاريح
قلت ألزمو والخرب جاله صماده

ضهر ومتنه يلفح الريش تلفيح
يرمع بمتن(ن) ماتجيه البراده

اللي يشوف الخرب قال التفاريح
واللي يشوف الطير هل الشهاده

الطير وصل الخرب مافيه تبريح
شكه براسه وابشرو بالسعاده

من فوق متن الغيم جابه على الضيح
(كنه المضلي في حروب الاباده)

انا أشهد انه يشرح البال ويريح
يوم الهدد والقول يبغى وكاده

© 2024 - موقع الشعر