هل رأى الحب سكارى

ياشبيه الحور .. يسعد لي مساك
حزّة(ن) موتي دنا .. ثم(ن) دنا !

اذبحيني دامني ميّت معاك
والتنازل عند ربعي .. للفنا !!

مرخص(ن) عمري على كفة غلاك
لنّك اعذب من رذاذ الدندنا !

قد حداني من على قلبي حداك
الهوى اللي مايثمّن بالثنا

القمر يخجل ضياءه من ضياك
والضحى شمسه يضيع ابها السنا

انتي اجمل من تقاسيمك ... لقاك
وانتي عطر الورد ملبوس الهنا

واهني اللي قضى عمره معاك
اشهد انه في حياته ماعنى !

راقيه من طيبتك ربي جزاك
شامخه ماتعرفين الإنحنا !

لو تهب العاصفه يقصر لغاك
بنت شيخ(ن) ماوطى درب الخنا

الشعار اللي رسمته من بهاك
(( كلنا نهوى بعضنا كلنا )) !

كل شي(ن) فيك زاهيك وزهاك
مبسمك .. شعرك .. خدودك .. والأنا !

شاعِرك مقتول قادِم مِن هُناك
ياآلهي كَمْ تمَنيتك هُنا !

إنْ رحلتي كيفَ للعاشِق يَراك ؟
هل سَيرحلْ ذاتَ يوم(ن) مُلكُنا ؟

زلزلي من تحت أقدامي رِضَاك
وأخبري في عِشقُنا .. عذالُنا !!

فدوتك عمري وانا كلي فداك
فدوتك وان رحت .. كلي .. لك .. انا !

صدقيني ماطرالي في هواك
يوم تشدي ( كوكب الشرق ) الغِنا

غير شطر(ن) قد سمعته ياملاك :
هل رأى الحبُ سُكارى مثلنا ؟!