اهداء الي بو نايف (محمد بن عقل البويدي)

عجزت اكتب لي ابيات(ن) تعبّر عن غلا رجّال
حقيقه فوق وصف الشعر مقياسه ومقداره

الا ياشعري المسكين الا ياشعري المختال
علامك لعنبوا حظك ترى الايام دواره

تجيني تطلب افكاري واقول ان القلوب احوال
واقول ان الشعر اقرب من النجمات واقماره

واكيد بتطلب التوبه واحطمها بك الآمال
واضحّك نفسك بنفسك صدى الاوزان واوتاره

انا بسقيك ياشعري عذاب الهم والغربال
بطوّع راسك اليابس على النيشان معياره

مادام ان الرسن بيدي ابلعب لعبة الخيّال
ابطويها متاهاتك غصب عنّك اذا كاره

ابركض في ميادينك من الدمام لين قيال
وتسمع فيه كل الناس من اقصى ( عنك ) للحاره

لجل اذكر تعابيره ابرقى وارسل المرسال
وابعزف بالنغم نوته على طاريه واخباره

ابو نايف ياعل الشعر لاطافه يصير اغلال
وترْ قلبي على اسمه عزف (نغمات مختاره)

خوي المرجلة والطيب وطبعه عاشق الاطلال
يموت الوقت ماتطفي معاميلة ولاناره

حميّه مع دهاء وطيب وفطنة بدو عال العال
لوانه سهْم في بنك المراجل طيّح اسعاره

تطيح البورصه .. والسوق فلا يسوى خطير ريال
لأنه عملة(ن) صعبه وقف مندوب ديناره

ربوعه تنطح الهيّه وتكسر خشم كل عيّال
لها في محفل التاريخ قصص واكوان تعباره

عساني ماتوهقت بحروفي معك يارجّال؟
وانا والله لوتسمح ضروفي جيتك ازياره

لواكتب ويش ابكتب فيه حرام الشعر به سلاّل
الى مني ذكرت اسمه (اجيب العيد بالطاره)

يجف الشعر لامنّي بغيت ابدع به الامثال
يضيع بساحة التوصيف فعل يمناه وايساره

وسلّم لي على نفسك سلام(ن) حيل به تبجال
وعلى (خيّالة العليا) سلام(ن) وافي اشباره

علامك ياقصيدي مختلف فيك الهوى والبال؟
اذا ماتصدق الشاعر امانه وصّل اشعاره

انا شفته وجالسته وزرته في شهر شوّال
لذلك رغم قيفاني .. عجزت اوفيه مقداره