التحدي - مهند العشيش الخالدي

تحدّيت العشق وآنا لاحول(ن) ولاقوّه
ابدخل في متاهات الحبيبه و(اعزف القانون)

وهذا منطلق حرّية التعبير يافوّه
براكين الغضب لو كنتوا يالعذال ماتدرون

تحسْبون الفتى اللي في عذاب الحب يتفوّه
يقضّي ليله الغابر وطفل(ن) يلعب البالون!!

رسمت بريشة الفنان وطاحت من يدي الغنوه
حدتني دنيتي لو كنت اجامل واخفي المكنون

اذا كان العشق ماتشتعل نيرانه وضوّه؟؟
فلا بالحب خير(ن) كان هو ناصح ولامجنون !!

انا اشهد تلّني من اقصاي ولالي بالفعل جدوه
جذبني جاذبيه ماعرفها (نيوتن) و(طوسون)!!

هنا كانت لي القصه هنا كانت لي البلوه
سواهيج(ن) عليها سارت الخطوه وانا مغبون

هنا عاهدت محبوبي على المر وعلى الحلوه
وهنا كان الغدر أسمى تعابير الوفا مدفون!

هنا راجعت قلبي قلت له : وش تنفع الخوّه؟؟
تشجّع لايهزّك طرف(ن) اكحل بالوصف مزيون

غرقت بجملة اوهامك وكل حصان له كبوه!
اقرّب في ذراها واثر بعض البيض يختالون

انا ماانحني لو قلت لك : كل العمر فدوه
وحتى لو عطيتك كل ماعندي لكم عربون

صحيح انك دخلت بخافقي والوجه متشوّه
وانا ماشي على النيّات .. لاطالب .. ولامديون !

وصحيح اول سيوفك كانت الغفوه ورى غفوه
تعدّت مرحلة حبّي حدود العالم المجنون !!

انا كل مااقول اني احبك .. قلت لي : حلوه !
تساوى عندك اللي مؤمن بحبّه مع السالون !!

مثل مااسقيتني نار الوهم في حزّة النشوه
بجازي صدك الظالم وكل يوم(ن) يجيك بلون !!

ومثل ماكنت اجيك اول ضعيف ويطلبك عفوه!!
ترى جيتك نهار اليوم راسخ مثل ابن خلدون !!

تعمّقت بغلاها حيل وكل عالم وله هفوه!!
وبانت لي خفاياها واهل الحب مايبقون

هذاك اول يابنت الناس (( لاحول(ن) ولاقوّه )) ؟
أبشّر قلبك القاسي (( كسرت القلب والقانون ))!!

© 2024 - موقع الشعر