ياللي على اللحيه حكمتوا بالاعدام - محمد بن دغيـّم السميري

محمد بن دغيّم السميري العتيبي
ياللي على اللحيه حكمتوا بالاعدام

سالتكم با الله ويش القضيّه
والله قد وصى عليها بالاكرام

وصى عليها الله ووصى نبيّه
سنة محمد كيف ترخص وتنظام

ردوا عليّه يارجال الحميّه
لاعدامها يجلب عماله وخدام

وتعدم وهي من كل ذنبٍ برّيه
والله حرام يحشّها موس حجام

تعرض على الامواس صبح وعشّيه
تحلق بموس وتنرمي وسط حمام

خطيةٍ ياكبرها من خطيّه
حلق اللحى عند القديم من الاقوام

مافيه للي يفعله مقدريّه
وعند السلف تقصيرها جرم واثام

وكانوا يعيبونه هل الجاهليّه
فيه التشبّه بالنسا ظلم واجرام

ومخالفٍ للفطره الادميّه
وشعر لحانا مانبيعه با الاقيام

لوفيه نعطي ملك قيصر عطيّه
شعر لحانا له قوانين واحكام

ونوصي ابناناعليها وصيّه
نرهن لحانا في مهماتٍ جسام

وبها نحل المشكلات القويّه
وليا رهناها ثبت رهن والزام

حسب سلوم جدودنا اليعربيّه
ياللي تحسب ان حلقها فخر ووسام

مافيه فخرولاحياةٍ طريّه
الفخر والله والسعد والتقدام

في سنة الهادي خيار البريّه
ماهوب في تقليد عدوان الاسلام

اللي يحطون المحارم مطيّه
العيب في تقليدعباد الاصنام

الفاسقين اهل الدروب الرديّه
والعيب والله في التخاذل والاحجام

والعيب تبع الموضه الاجنبيّه
والفخرفي ممشاًعلى الدرب قدام

درب الرسول اللي دروبه نقيّه
عساني احشر معه بكره ليا قام

انا ومن كان اله حق عليّه
وجميع من صلى لربه ومن صام

ومن يشهد ان الله وحده وليّه
وآردعلى حوض النبي واشرب شمام

ويوم آرده وليا معي والديّه
صدفه بلا ميعاد والعالم قيام

في ساعةٍ كل المخاليق حيّه
عليه اقابلهم بعد كم من عام

لا واهني من شافهم واهنيّه
وياالله بتوبه قبل يقضن الايام

مدام باقي من حياتي بقيّه
قدام تطوى الصحف وتجف الاقلام

وقدام اعض من الندم ناجذيّه
الموت مالي منه مهرب ومهزام

ياعمر والله ماتردّه أيديّه
لابد ملبس قطعتين من الخام

واللي جرى للناس يجري عليّه
والدايم الله وافضل الخلق مادام

لو دام احد مامات خير البريّه
وصلاة ربي عد ذعذاع الانسام

على خيار الاسره الهاشميّه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر