يالله الخلف - محمد بن حسان

ما يفيدك يا حبيبي ما يفيد
يوم تفتح كل صفحات الملف

تفرح بزلّه و كنّه يوم عيد
وأنت خابرني معك مثل الألف

وش حصل ..؟ ماظنّتي شي ٍ جديد
غير همّ .. وحظ يكويه الصّلف

والله إن صبري يذوّب لك حديد
لو لقى غيري يعرّضه التلف

لو تعيد ولو تعيد و لو تزيد
ضاري ٍ قلبي على حدّ الشّلف

شف ضلوعي من جروحك تستفيد
كل جرح ٍ له طريقه تختلف

همّي اللي ما يخليني وحيد
ما يفارقني ولا عمره ذلف

والفرح ... حلم الشطاره للبليد
كذب واضح .. لو تحدّّه ما حلف

لو بغيت أفرح وأقول إني سعيد
قلت للفرحان / ما عندك سلف ؟

مايروفك غير شخص ٍ من بعيد
عادة الأيام من عهد السلف

إن زعلتي ما حصل شي ٍ جديد
وإن رحلتي قلت ( يالله الخلف )

© 2022 - موقع الشعر