حاجتي ميعاد - محمد بن حسان

بعد إذن الدقايق والثواني حاجتي ميعاد
أشوف اللي خلقها الله قمر ما هيب إنسانه

أجي بالشوق واللهفه وكني صاير ٍ منقاد
أجي بعروق عطشانه أجي بجروح شفقانه

أعانق فرحتي وأكشخ وأغير شكلي المعتاد
أزين غترتي مره .. ونوب آقول خربانه

أرش العطر في ثوبي يفوح لوصلها بعناد
أسوق اخطاي للموعد ونفسي حيل ولهانه

أقابلها من الفرحه من اللهفه يضيع الضاد
أحاول أرسم البسمه ولو هي كذب من شانه

أقول النور بوجودك .. تقول النور بك يزداد
أقول إشتقت يا عمري . تقول بليز خجلانه

توريني هدايا جبتها في حفلة الميلاد
توريني قلادتها وهي من جد فرحانه

وخصله من جدايلها تغطي خدها الورّاد
وبسمه كنها تشرق بنور الطيف وألوانه

نسيت أيامي الغبرا وهمي .. والحزن منباد
تمنيت الزمن يوقف عشان أضيع بحضانه

تلملمني مثل طفل ٍ يحاول ينطق الأعداد
مثل ما عدت اظلوعي وتترك للغلا خانه

وفجأه قالت محمد !! تأخرنا وهيا عاد
ترى وقتي قصير وعاذلي ما يحفظ لسانه

شبكت بكفها كفي عسى وقت اللقا ينعاد
عسى توقف بي الدنيا ليا من مر نسيانه

ترجيت الزمن لحظه .. دخيلك حاجتي ميعاد
أشوف اللي خلقها الله قمر ما هيب إنسانه

© 2022 - موقع الشعر