المستحيل

تمشي تجاهي باعتقادك وانت في مشيك ورى
متوهم وظنك خطا نصيحتي لك تستخير

عندي خبر لك فيه بشرى تو ما ليلك سرى
دربك سنود وجنتي والله ان تقلب زمهرير

فكر تقيس الارتفاع من الثريا للثرى
والا تشيل المملكه وتصير في روضة سدير

او هل بإمكانك وان امعنت بالنظره ترى
صفايح وكرات حمر وبيض في دمك تسير

والا بإمكانك تجيب عيون ماجاها كرى
والا تجيب انسان عايش بس ماعنده زفير

والا تجيب انسان لايسمع ولا حتى يرى
وتسلمه مركب فضائي باول الرحله يسير

فكر وكان اللي طلبته صار معقول وجرى
بعدين تقدر تقتنع في ماتوقعته يصير

ترى المشاعر كان تفهم ماتباع وتشترى
لاهي تحت حكمة ملك ولاعجز عنها فقير

ولاتقاس بمجتمع والا مدن والا قرى
والا مع الشخص السليم ومنحرم منها ضرير

لاتعتقد صفق الهبايب منه بالمطمن ذرى
نصيحتي لاتترك الفيّه وتسعى للهجير

كانك دريت وشفت ردي علم اللي مادرى
هذا اللي ببالي ولخصته وجبت من الأخير

وفي آخره بقول لك كل اللي ببالك طرى
ما والله اظنك تحصل منه لو انك تطير