النيص

لـ فيصل السواط، ، في غير مُحدد

النيص - فيصل السواط

الصبر طيّب والرديّه من ردى حظ الحليم والتربية واجب على الأستاذ لو ضاق الصبي
مادون حلقي غير سيفٍ ساطي وعقلٍ سليم ولاّ تركت النيص يرميني ويصطاد تعبي
مالي ملام ..أعوذ بالله منك يابليس الرجيم ياللي توسوس لي عشان تصدّني عن مذهبي
الاوله عدّيتها والثانيه دون الصميم والثالثه عرفت منها ياسويلم وش تبي
يالابس ثياب الصداقة وانت في قلبك خصيم وامسوّي انك عند خلق الله ذكي وانته غبي
ماصغّر عقول الحريم الا سواليف الحريم وانا احمد الله لحيتي محشومة بعز شنبي
إستغفر الله العظيم..إستغفر الله العظيم قوم اذكر الله واشكره وادعي وصلي عالنبي
قدّام لا اخلّيك عبره للمواطن والمقيم يامعلّق بروس القبايل وانت منت بيعربي
مدّيت كفي بالوفا وانته تحسّبني غشيم وانا على وضح النقا..وانته على قرن الظبي
تلعب بك رياح الظنون وغرّك الفكر العقيم اللي رمى بك من على راسي على حدّ ركبي
لولا العرب وعيونها والنار شبّت فالهشيم والكوره اللي شتها طارت وجات فملعبي
ما انكّس حروفي عشان يذوقها القلب السقيم لنّ التفاهه والعداوة ما تحقق مطلبي
لكنّ هذي حالة الدنيا من الوقت القديم ولاهي غريبة لو تجي خسارتي من مكسبي
بس الغريبة لو نشاهد صورة ابليس الرجيم اللي يوسوس لي عشان يصدّني عن مذهبي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر