اليوم الوطني - فيصل السواط

ياهجوسي سيّري حول الكره الأرضيه ثمّ هاتي ما يجمّل دلتي وقنادي
السوالف كايده والمشكله شخصيّه والقضيّه كلبوها جمرتي وزنادي
قالوا اكتب فالوطن قصيدةٍ شعريه والشعر ماهو كفو يوصف شموخ بلادي
المعاني راس مال الوزن والقافيّه والوطن هذا يظلي راس مال فوادي
بس مايمنع نجيب من الغرام شويّه لو حروف الشعر دايم تستبيح عنادي
ولن كلّ ايامنا اللي فالسنه عاديّه غير هذا اليوم عندي يوم ماهو عادي
فالسنه عيدين شرعيه فطر وضحيه واعتبر يوم الوطن ذا ثالث الأعيادي
ياوطن يسعد صباح المجد والحريه ياصباح الفل مدري ياصباح الكادي
والله انّا نعشقك عشق القلوب الحيّه للكرم والطيب وحزوم الحطب والوادي
يابلاد الخير والتوحيد والشرعيه ياثرى المجد التليد اللي صنعه اجدادي
ياذرانا لا بقانا بين شمس وفيّه والحدود الها حدايد والسيوف حدادي
ماتخوّفنا سوايا شلّه ارهابيه ولايغيّر فكرنا علماني وإلحادي
نعرف الدين الحنيف ولا نحب السيه ومجتمعنا مسلم ولا انكر حقوق الزادي
عايشين بظل ابو متعب نظيف النيه خيرة ملوك العرب ديّن وشخص قيادي
له محبه بين خلق الله وله شعبيّه اعتبره ابوي عمي خالي واستادي
هيبه وطيبه تواضع دين وانسانيه والله اعلم حبّبه للناس حب الهادي
كم فقيرٍ سد جوعه بين ذاك وذيه وكم يتيمٍ قال له تسوى جميع اولادي
ماذخر من دون شعب المملكه ربيّه وصار دور المملكه فالعالمين ريادي
كم مصنع؛ كم معهد؛ جامعه؛ كليه كم به من مدرسه؛ كم مزرعه؛ كم نادي
بيّض الله وجه اخو نوره بياضٍ زيّه راعي الكف النديه والضمير البادي
كلنا دون الوطن قنابلٍ ذريه لو يحاول من يعادينا يجينا عادي
عادت اعيادك بخير وروحي العيديه ياوطن ما يستحقه شعري وانشادي
وكل عام انتي بخير وعزّ ياسعوديه يابلادي في بلادي عيّدي يابلادي
© 2024 - موقع الشعر