سقوا اليا هبت هبوب البرادي
والصيد جانا للمخاضير عبار
والوسم طاح وعشب الاراضي زادي
وسم البكور وشامل كل الاقطار
والقاع قفر والاثاري جدادي
واتشوف به فقع وفي القاع نوار
ونوه علينا اميرنابل وكادي
قال اجهزوا ترا الوعد ضلع سنار
أيمن مقيب النجوم نمشي قصادي
على طريق طريف نمشي مع القار
معنا الحرار اللي امناها الهدادي
الكل منهن لا برق الريش عفار
معنا فروخ علما باجتهادي
والكل منهن صاد في القاع وطيار
وخطوات شيهان اليا هد عادي
لحاق للمقفي ولدم نثار
وليا مشى طير السعد والسدادي
الله يفكه من صواديف الاشرار
سرنا وراه ومشينا بالركادي
من خوفنا ياتي معاصير وغبار
وليا اعتلينا في طوال المبادي
كل خذا البرقع وحقن بالانظار
وتطلعن يبقن كبار الثنادي
والكل منهن ثبت والطلع باصخار
والشيخ هد الطير بأرض حمادي
وقامت تخيشله تكبر تكبار
ثم طرها طرت عديم العوادي
واما البقيه كلجواليق خمار
تراوسن مثل الرضم والهوادي
يشبه صفار عيونهن ورد الازهار
والكل منا هد طيره وصادي
جول عثينا به تدمر تدمار
نادا علينا الشيخ ضحوا بوادي
لاجل الوقود الزين شبولنا النار
لاستر ابو متعب تطمن الفوادي
ونادى على دهيران والربع حضار
ودارت سوالفنا وفيها عنادي
والكل منا قال انا خوش صقار
والشيخ مستر بطيب المبادي
صيد وتوفيق خذا فيه مشوار
عسى لسلطانه من الرب هادي
لو كان سابقني على البيت شعار
عساك في الدنيا تنول المرادي
يا اليث يا الضرغام يانمر الانمار
النايب الثاني بالأمجاد سادي
يدور قالات عضيمات وعسار
يروس قوات الحرس والبوادي
دون الوطن والشعب لاصار ماصار
نمر ولد نمر فعوله وكادي
عبدالعزيز اللي حما البر وابحار
وانجب حرار يكمعون الاعادي
من شاخ منهم يكرم الشعب مابار
وانتم مرويت السيوف الهنادي
وانتم هل الناموس وانتم هل الكار
خليتوا الاسلام يمشي سنادي
والي مشى ضده تدهور تدهوار
واحميتو السنه ودرب الرشادي
بحكم الشريعه فايق كل الامصار
هذا وصلوا عد نشر الجرادي
على نبين كرر الحق تكرار
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.