الحلو مشيه علـى حبـه - عبدالله مرزوق المرشدي

الحلو مشيه على حبه
يازين شكله و هو ماشي

لاقبل تقول انه مشبه
كنه من الأرض متحاشي

خصره وردفه تلاعبه
ما بين ثابت ورعاشي

جافل على طول متنبه
يحتاط من هرجة الواشي

يفقد لبيب العقل لبه
ويضيع فكره وينداشي

ماهي نحيفه ولا دبه
ريانةٍ عودها ناشي

جبينها كنه اللمبه
وخديدها كنه الشاشي

جمالها واصلٍ تبه
تصرف من الزين بالكاشي

تقول بالحسن منصبه
لاشفتها هيضت جاشي

الموت كان الغطاء ذبه
تلامع بروق وفلاشي

كله فتن ربي و ربه
وش لون للحين ما انّاشي؟

لو امدحه كني اسبه
والخافي اعظم من الفاشي

هي سبة الجرح هي طبه
هي جمرة الشوق لاطاشي

من شافها كنه مسبه
مخطور يبغاله نعاشي

خطرٍ على السوق لاطبه
منه المزايين تنحاشي

لاقبل يجر الخطا كبه
لا تلتفت فيه يا ناشي

وان كان تقدر بعد هبه
عساه ينصاب برباشي

قل يا ولي المها خبه
ان كان تبغاه يعتاشي

ان كان تغليه وتحبه
خله على طول بفراشي

تراه للمشكله سبه
لاتتركه يرمش ارماشي

من عقبه السوق ما طبه
ياكود لحظه وانا ماشي

© 2022 - موقع الشعر