هات القلم...

عطني قلم عندي كلامٍ مقدا
للي شكى من جاير الوقت وده

خل الهموم اللي بقلبي تبدا
من عقب ما هي بالخفا مستبده

عزي لمن قامت ظروفه تحدا
من كل جال وجال تبغى تحده

حاله مع الأيام ضدٍ بضدا
كن الليالي بالمقادير ضده

تشده الدنيا من أقصاه شدا
ولا له على صكات الأيام شده

بيّح كنينه ما بقى فيه سدا
من كثر مابه بيّح الصبر سده

ان قال بكره زان بكره تردا
لوزان وقته يوم مسرع مرده

يذكر زمانٍ فات وقته وعدا
ذاك الزمان اللي من العمر عده

يوم الصغيرّ بالكبير يتقدا
والكل منهم عارفٍ ويش قده

يوم النشاما للمصاعب تصدا
تثور في وجه الغريم وتصده

كانت علاقتهم محبه وودا
خويهم يلقى الغلاء والموده

وعيونهم يم قصراهم تلدا
تسعف قصيٍر جاير الوقت لده

دايم وقول الحق فيهم مبدا
شعارهم ماتستحي منه بده

اللي مضى قد راح مافيه ردا
يصب على المخلوق مافات رده

دارت رحى الدنيا وقامت تمدا
على الخطر ترمي شركها وتمده

محدٍ نجح فيها بجهدٍ وكدا
الابتوفيق الولي في مكده

تقفي وتقبل بين جزرٍ ومدا
لذاتها ماتعطي الناس مده

الرابح اللي فالعبادات جدا
ماضاع في طرد الملذات جده

رجواي باللي لاومر مايردا
امره بكاف ونون محدٍ يرده

ارجيه من لطفه وعطفه يمدا
وارجي ثوابه من جزيلات مده