هات القلم واكتب على الطرس يا عقاب - شاكر هذال الدغفلي

هات القلم واكتب على الطرس يا عقاب
علم(ن) ليا جاء ساعه العلم محسوب

علم(ن) مقاديمه تحيات وارحاب
وافتح لزينات المثل كل دالوب

خلك معي حذرا تغير وتنصاب
وحذرا تفكر في تفاكير ودروب

ابغاك تفتح للمثل درس وكتاب
وتكتب لبو نايف من الناس مكتوب

رجل(ن) طلع صيته على راس مرقاب
ما فيه من شنعات الايام عذروب

راعي طواريق(ن) حسينات وعذاب
اغلى من المرجان وابيض من الروب

فيها الكرامه والشهامه والانساب
مادام راعيها على العز منسوب

والمدح للممدوح واجب ولا شاب
ما شاب لله مدح عنتر وشيبوب

من عزوة(ن)دايم يفكون الانشاب
لا جاء نهار(ن)فيه غالب ومغلوب

اهل السيوف الي لها حد وانصاب
حد(ن) يخلي صاحي القلب منجوب

قله ترا قلبي عليل(ن) ولا طاب
قلب(ن) من الهاجوس والهم مكروب

ولولا الشعاره عادة القلب نهاب
والقلب من زود التجاريح منهوب

ولولا السبايب والغرايب في الاعراب
ان كان ما غنيت سامر ومسحوب

اشكي عليه ومنه في بعض الاسباب
حيثه عديم وفي اللقا يكمل النوب

والنايبه عنده لها صوت حراب
لا صاح فيها بين حارب ومحروب

جعله يصيح ابها على راس كذاب
حتى يعرف انه للاشعار كاذوب

ويتوب عنها وان مضى الوقت ما تاب
نكتب على خده مواعيد عرقوب

ولا الصدوق اصدق من اسهيل لو غاب
ما يلبس الثوب ابيض الوجه مقلوب

وان جا مع اهل العرف والمعرفه صاب
ما هوب في بدع التماثيل مغصوب

للحمل شياله وللخيل ركاب
هذي على الخيبه وهذي على الصوب

محتار انا ما بين شاري وجلاب
واصبحت ضايق داهش الفكر مسلوب

مدري وش الي يكتبه رب الارباب
كلمه رفيق(ن) لك على الشعر محسوب

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر