ياعيد هات القلم والبوك ياعيد
الله يمينك من العثرات ياجرها
أكتب عسى باقي الايام ياعيد
أخير من ماضي الأيام حاضرها
ياعيد فند حروف الخط تفنيد
والكلمة اللي تبا التفسير فسرها
أوجز ترى موجز الكلمات يا عيد
يلفت نظر سامع الكلمة وناظرها
يالله ياللي بديت الخلق وتعيد
ياللي خلقت البشر مسلم وكافرها
يا فارج الهم من كربه وتنكيد
تفرج هموم على روحي تعورها
جتني هموم الدهر جمله وتفريد
عيت عيوني تريح من عزايرها
يجمد الدم في الشريان تجميد
خطر على القلب وعروقه يفجرها
والليل من كثر حساتي سراميد
انظر نجوم السماء فوقي وساهرها
ضاقت علي الفضاء والبحر والبير
وضاقت علي الجزيرة من معابرها
قالوا علامك معصب قلت:ماريد
خلو كلام الحناجر في حناجرها
قضية عقدوها الناس تعقيد
تعقدت والمشاكل في تطورها
مقرود وأصبح نصيبه مع مقاريد
واللي بناها أمس من بكره يدمرها
عامين زلت وباقي عام تمديد
طير البحر ما يودي نجد طايرها
أنشد وأدور حكيم الراي ياعيد
اللي يحل القضيه ما يوخرها
تبالها واحد ماهوب رعديد
شيخ ٍيحل المشاكل ما يعكرها
انص النوادر ولا تنص الهرابيد
ان صار لك حاجة منته بقادرها
عليك باللي يوردك المواريد
يسقيك من جمها قدام غثبرها
خل الضعيف يولي والسلابيد
دور لها نادرٍ يقدر يعبرها
برق الحيا يجذ ب العساس ياعيد
والديره اللي على دربه يخضرها
والطيب مثل الحيا يسقي الجراهيد
تلقى رجاله ليا غليت مساعرها
نصيت شيخ يسد وفيه تسديد
من روس شوخٍ جميع الكون خابرها
شيخ ولد شيخ ماهوب تقليد
انشد وتلقى الحقايق من مصادرها
ماهيب إمارة ختم عمده وتعميد
أمارة يلحق العربان شابرها
إلياتردي ردي الخال يا عيد
تلقى ر جال لياكبرت تيسرها
كلمة هلا وآلمه عند الأجاويد
يقضون حاجات من جاهم يدورها
يرمون للضيف خرفان ومفاريد
ودلال بنٍ مملات مباهرها
والعود من ديرته جابوه توريد
يشرون غال البضائع من بنادرها
أفعالهم ما تبا نصره وتأييد
الحي واللي تضرم في مقابرها
عاداتهم ما تغير بالتقاليد
لو الليالي تغير ماتغيرها
بين الرفايع ومشروع الحماميد
شبيرمه صيتهم بالمجد عامرها
عسى الحيا فوقهم يمطر تماديد
تسيل وديانها من نو ممطرها
والله يا لولا ظروف الشغل وبعيد
لشد من ديرتي بكره واجاورها
حيث انها ديرة الشوخ الصناديد
شيوخ الزعامة وتتبعها عشايرها
حزمان بقيادة الشوخ الأماجيد
عداونهم يا بدر تكثر خسايرها
ليا تلقوا من العدوان تهديد
زاروه في ديرته قبله يغادرها
إلهم على قمة العليا مسانيد
قبيلة ف.. الوغى محدٍ يخاشرها
تزور دار العدو لو إنه بعيد
وتصبحه بالنذر قدام ينذرها
أسود غابة تضد الضد وتصيد
يوم الثعالب تلجأ في مجاحرها
يشبع على دربها الحوام وقعيد
علم الطبيعة إذا نسيت يذكرها
وأنا ما أسب القبايل والأجاويد
أجنب الناس طايلها وقاصرها
أخص بالمدح خطلات العماريد
قبيلة تنصر المولى وناصرها
نصيت شيخ يسد الدرب ويزيد
كن الوزارة تحت ملكه يدبرها
ينهيك ما يعطي السايل مواعيد
ما هوب خبلن على غيره يصدرها
نواف نايف على سمو الأواليد
يستاهل البيض من قدم بشايرها
سموك نواف يوم النوف تأكيد
اسم على قدر شخصية مقدرها
رجلٍ سنافي يفيد الناس ويفيد
يستاهل الطيبه يا مير باذرها
والطيب من ساسكم ماهوب تجديد
الجد والخال وأعمامه نوادرها
بين القمر والنجوم معرب السيد
وأكيد طيب المعادن من عناصرها
فوق الثريا منازل كل صنديد
منازلٍ ثابته محدٍ بمنكرها
مني عليه الثناء من غير تحديد
وأقول مشكور من قلبي وأكررها
والله لونه ورى حزم الجلاميد
لزور بيته ولو كثرة مخاطرها
عرفان بالطيبة ماني بجحيد
أقولها في أول الكلمة وفآخرها
زيارتي للنشامى يا بدر عيد
اتجارة للنشامى في متاجرها
يفدونه اللي عن الواجب ملابيد
قوم تصك المجالس دون خاطرها
مثل الحباري على الرقه مجاليد
تخاف من نادر يفدا نواحرها
عند الربايع يسوقون المعاويد
وليا بغى حاجته لازم يشاورها
تعطيه زود الكرايد والمراديد
مجبور ولد الردي يسمع لوامرها
يخبرك عما ذكرته زيد وعبيد
والناس يدرون بالسيرة وسايرها
والناس تعرف محمد من محيميد
كلن يعرف النحاسة من جواهرها
عبرت عن نظرتي من غير تنديد
يوم القبايل تعبر عن مشاعرها
هذا كلام الوفا مالي مقاصيد
أفخر بهم والفخر للشيخ ذاخرها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر