هات القلم - صحن بن قويعان

هات القلم واكتب كلامي وانا امليه
ابيات شعرٍ تعجب اللي قراها

مثايلٍ من شايبٍ في بناخيه
ماقلتها فيه اتحرا جزاها

والله ماقلته ولي مقصدٍ فيه
لا حاجةٍ عندي ولا في رجاها

لا شك يعجبني ليا اوحيت طاريه
حرٍ صعيبات المراقي رقاها

يفعل فعولٍ تتعب اللي يماريه
ماهي هينةٍ على من بغاها

ابا امدحه والمدح قده وزاهيه
ماهي سوالف واحدٍ ماقداها

ماقول قولٍ لين ابين معانيه
ماضيع الكلمه بغير معناها

امدح بها مزعل خصيمه ومرضيه
اللي ليا مالت رفع مستواها

يزعله ليا منه اخطا مماشيه
ويرضيه ليا جت من بعيد التقاها

يشره اللي يفهمون المشاريه
ويسنع اللي ماتسنع خطاها

ماجد حكيم الراي دامت لياليه
ليا شقها غيره برايه رفاها

مفراص ماصٍ ماتعقد مثانيه
ماتوخذ القاله وهو من وراها

حيدٍ يذري من قعد في مذاريه
عقب الفهود اللي يذري ذراها

ماغواه تيار الجهل في مباديه
مشى الدروب اللي محمد بغاها

رسم حدود الدار واسس مبانيه
وسكانها ارضاها وطور ابناها

وختم الكلام الله على الحق يهديه
ويكفيه شر اشرارها واحسداها

© 2024 - موقع الشعر