قم يانديمي ضـرف الخـط تضريـف

قصيدة اخوي نجم
يقول من يبدع جديد المحاريف

اللي على ساساً جويداً بناها
يصرف القيفان بالفكر تصريف

قيفان من زين المعاني نقاها
ما ياخذ القيفان من بنك تسليف

ولا هو من اللي باعها واشتراها
ولا هو يحرفها عن الغير تحريف

من قدح راسه ما يدور جزاها
ماقالها في مدح مجحود وضعيف

يبى يدور فايده من وراها
اقولها للي كثير المعاريف

الطيب نفسه من فعوله كساها
طامي وسيع العرف زبن المخاويف

له قالة(ن) بين البرايا حماها
تلقاه في بيت(ن) مشيد على السيف

في حلة(ن) من ظاق صدره نصاها
تلقى على ضوه دلال(ن) مهاديف

بن اليمن من سوق صنعا جناها
ونجر(ن) ليا حرك يجي له غطاريف

ونار(ن) يجيب الضيف عالي سناها
لاشاهد الضيفان صابه تخافيف

من فرحته عجل(ن) يدور عشاها
ابشر ليا جيته بزين السواليف

ووجيه ربع(ن) عالي(ن) مستواها
انا اشهد انه شرف الربع تشريف

ابوه نفسه بالمراجل سقاها
ما هوب من يتبع كثير السفاسيف

اللي على الغرات تتبع هواها
ناس(ن) تصف الحكي بالكذب تصفيف

واول خمايلها تصيب اقصراها
هراجت المجلس تحب الملاقيف

ترخي على العربان تبحث خفاها
الطيب يبغا له شراع ومجاديف

ماهوب هرجه من بغاها حكاها
الطيب يبغى له قصور(ن)مناويف

هذا هوا نفسي وهذا مناها
وقلبي يابو خالد كثير اللواهيف

تمشي به الدنيا على مبتغاها
من هاجس(ن)زادت عليه التكاليف

يبدي بها لاهل الوفا من وفاها
جتني ركاب(ن) يابو خالد مناكيف

من رحلة(ن)ما يندرا وش وراها
ارسلتها من عندنا بالتواليف

واليوم جتني والحزون بخفاها
جاني مع المرسول عدة مضاريف

لاواعذاب اللي سواتي قراها
اللي كتبها من رجال(ن) عواريف

يقول نفسك كيف ترضى شقاها
يقول ما نرضى عليك التخاليف

في غفلة(ن) عنها وغيرك لقاها
لاتحسب ان الوقت دايم على الكيف

وان الليالي تستمر بهناها
ماهيب خلفات(ن) لمثلك معاطيف

لابد لو طالت تكدر صفاها
قلت العفوا وش لون هذي تخاويف

دنياي جنه عايش(ن) في هناها
مادام غزلان الفلا لي مكاتيف

قلبي خذا منهن وقلبي عطاها
وشربت من جم الثمان المراهيف

تروي ضماء نفس (ن) قليل(ن) ضماها
وجربت حب منقشات النفانيف

كم صفحة(ن) قلبي عليهن طواها
ياما قهرت قلوبهن بالعساليف

كم عيطموس(ن) جرحها في حشاها
وغرفت من دنياي حلو المغاريف

اللي على كيفي تزيد بحلاها
قال انتبه حكم القدر كنه السيف

النفس ما ترضى عليها بلاها
ما ينفعك بعدين كثر التحاسيف

لادبح زمانك وابتدا منتهاها
والله ما تذكر جميع المواليف

وتتعب بنفسك ما تحصل دواها
من هو يابو خالد حسين التصانيف

اللي عطاني هرجته ما كناها
وهذا ردي على السكني النجيمي (نجم) حالياً

قم يانديمي ضرف الخط تضريف
خط(ن) بوسطه كلمتي ومعناها

ابن النجيمي ولف الشعر توليف
مثايل(ن) مثل الجواهر نقاها

غلف بيوته طيب الاصل تغليف
عساني اعرف وجهها من قفاها

حر(ن) مواقيعه بروس المشاريف
ابن الحرار اللي ينومس غذاها

من القروف محنية شذرت السيف
عوق الحريب وسعد منهو نخاها

قوم(ن) لهم في قمة المجد تشريف
مثل النجوم الباديه في سماها

يفداه خبل(ن) يخطف الهرج تخطيف
اللي حسد نفسه رعاها رعاها

خبل(ن) يدينه للرذيله مغاريف
ورجله عن الطالات يقصر خطاها

انا يابن عمي ربوعي عواريف
تطلق لساني يوم اعدد ثناها

اهل الجمايل كاملين التواصيف
سموا البقوم اللي يذري ذراها

متيهة حم البكار المشاعيف
من حيث ما تدل المخايل بماها

ومعسفين(ن) سبق الخيل تعسيف
لجل العيون اللي تدور دواها

رجالهم لاحس في الوضع تخويف
ابله على دار المخافه حداها

ماصدها عن شفها فالحجاريف
ترعى مشاهيها وهو من وراها

يبدي وراها في الجبال المقانيف
بشلفا على دم الاعادي سقاها

وسيف(ن) عليه الدم الاحمر تواكيف
ضربة شباته ما يحصل دواها

واليوم كل(ن) نام في بارد الهيف
في ظل من صان البلاد وحماها

وان كان يافرز الوغا جاك تكليف
وان الرسايل ماصلح محتواها

لاتتبع اللي طفف الحق تطفيف
احذف ورا دلو المقفي رشاها

ناس(ن) تجفف نبع الاحسان تجفيف
من الضماء لابد تابس شفاها

ومن داس بالرجلين روس الشناظيف
لابد مارجليه يشكي حفاها

واعرف ترا بعض السلاح المزاهيف
لاحركوها ثورت في خباها

وان كان ضيعت اللبن تالي الصيف
واخطا القدم في خوة(ن) له خطاها

ما ينفع المحروم لو قال ياااااحيف
ناس(ن) حرمها الله وناس(ن) عطاها

ومن دور المعروف عند السفاسيف
العالم اللي خيب الله رجاها

مثل الذي عن حاميات الملاهيف
يزبن على نار(ن) تلضى لضاها

هذا وانا ماحرف الهرج تحريف
والناس ما نشد طيبها عن رداها

وان كان نفسك طايبه من هل الخيف
لاتزعج الونه ونسمع صداها

وان كان حطت فوق كبدك مراضيف
وازريت تنسى يالنجيمي غلاها

اطلب وانا حاضر بكل التكاليف
بالجاه ولا المال نقدر علاها

وان كان مافادت جميع التصاريف
وانك تبا بالحرب تلحق غياها

جيتك بريحات(ن)سوات الشواحيف
جن المعارك كان دارت رحاها

لو صفوا اهل الخيف قيف(ن) ورا قيف
نجيك باللي جالس(ن) في حراها

وحب البنات ملهفات السراجيف
كم من قلوب(ن) قبل قلبك شعاها

قبلك شعني بالرموش المصافيف
واومن بحالي لين غلق جداها

وضفت نفسي في هوا البيض توضيف
لين ان داها شالته في رداها

فكر ملي واكشف لي الوضع تكشيف
وانا معك في الحاجه اللي تباها