يانديمي

يانديمي بالهقاوي ومخلفة النعوت
اختلف عد المسافات وانت تقوسها

بس لو امشي بالتأني والسكوت
شايفن رسم الخريطه على قاموسها

قدرت الله ماعليها من المخلوق فوت
لو جميع الخلق تجمع لها وتسوسها

السبب عندي سبب بالاماكن والوقوت
بس تقصر قدره الخلق عن قدوسها

للوفا واهل الوفا لو بغيت اجر الصوت
جاوبتني نجد بجبالها وحبوسها

واثنيت الصوت اطلع من الاعماق حوت
ماتحوش انيابها تطحنه بضروسها

في حياتي ماتذريت بيت العنكبوت
الهوى يلعبها والخشاش يدوسها

بالمواقف ماتعزر برديان السموت
ماتنومس عالم ساقط ناموسها

مايسر ولايضر المشني والشموت
شلة بهروجها ماتسر نفوسها

التحالف بالتخازل وسراد البيوت
انهزم جساسها وانكتم جاسوسها

ماتت الافراح بصدور ناسٍ تاتموت
القهر في نفوسها والردى في روسها

مهفن الله حظهم يوم يهفون البخوت
الحقايق عندهم غير ملبوسها

كل نمام مخرب وكل اهوج مقوت
شاطرين يبدلون الصور بعكوسها

الوفا دايم وفا والرداى ماله ثبوت
قد خذينا من قديم الليالي دروسها

ماتظلل شجرة طلع من الاغصان محتوت
يابسة وعروقها قام يمشي سوسها