على الفرقا أنا ما عاد أسأل ليه ولاّ كيف
قدر قلبك يخليني وكيف يعيش من دوني
وفا واخلاص انا جيتك وجيتيني خداع وهيف
مع ظروفي وعسر الحال وهمومي تِبلوني
ما كنت ادري لك القدره على التمثيل والتأليف
وانا التمثيل والتأليف لا طبعي ولا لوني
تطيح الأقنعه ويبان في وجهك سواد وزيف
يترجم واقعي المؤسف واجر الآه بلحوني
غدت أربع فصولي صيف واشقاني هجير الصيف
وانا مليت جلد الذات ليه وكيف خلوني
أشوف انك على طعني ياريميه تحدِ السيف
وكل ما هبّت الذكرى تجي وتجددِ طعوني
تحت كل الطعون تعيش طعنات ولها تجويف
تسولف عن خساراتي وضياع العمر وغبوني
عن جحودك ونكرانك عن الظلم وعن التسويف
وانا اتغاضى وأتغابى واكذب صادق ظنوني
وانا الواقف على الأطلال لا طرقي ولا به ضيف
رفيق الليل والوحده ودمع الحزن و جنوني
أنا برحل مع النسيان لكني قبل لا اعيف
أنا موجه عليك الله دخيلك حل عن كوني
ابي آسج بافكاري وابرقى فوق ضلع منيف
تعبت ابكي على الغيّاب دمعي جمر بعيوني
أبتقهوى قهر خمسة عشر فنجان دون حنيف
ولا ودي أحد ينشد عن احوالي ولا شلوني
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.