وين السلامه - سعد الطبيخي

قال السلام وقلت وين السلامه
شين جمعنا راح ماظنه يعود

راح الزمان اللي عليك احترامه
وتمددة في عين كاره ومحسود

اللي مشى بالحب يعرف نظامه
والحب مايحكم ولايرضى بحدود

من سبته ذلة رفيعٍ مقامه
وخلت شيوخ القوم حراس وجنود

مايلحق الوافين شك وملامه
والعاقل اللي سابق الحق بشهود

غير السفيه اللي موالي غشامه
هو يحسب انه غالي ودوم مفقود

طبع البشر لو زاد من فوق هامه
راحت عليه وصار مبلي ومنقود

مايطمعون الزود فيهم غمامه
ادهم من الليل وجواحيره السود

لاتخاوي الحساد تبكي ندامه
تحرق مثل مايحرق اصحاب الاخدود

وترك رفيق مدورين العسامه
اللي ليا هانت تلاقيه موجود

ورافق رفيق اللي مواليك عامه
يفزع ليا جالك من الوقت موعود

خلك جبل عاليه مليون قامه
كلن يبي ياصل معاليك ويلود

وارحم فقيرٍ عاش عامه وصامه
حاول يفك العقد لكنه معقود

يرجي فتات الخبز ويا يدامه
روّح ونام وضاع مافاد مجهود

ياللي تدس الراس مثل النعامه
مالك مكان اب مجلس الغز والجود

نرميك رميت حر يهواء الزعامه
من طلقت البلجيك ينهيك عبرود

صار الردى في خد راعيه شامه
تبقى علامه وين ماراح مرصود

ماينفعه لو زان وضعه مدامه
رسخ على التاريخ ميثاق وعهود

يازين لاتغتر بي ابتسامه
يمكن ورى سن الموالين بارود

خلك معا قوسك وصوب سهامه
ان ذل رقفان الرخاء وصرت محدود

واركد ليا جاتك سواليف سامه
الوقت كذبانه كثيرين ويزود

خلك حليم وفيك حزم وصرامه
لاتخلي النقاد تحلقك منقود

وختامها بلقاك يوم القيامه
واخذ حقوقي منك بالحق وشهود

واسامحك بعد العذاب وظلامه
وقول ربي ماخذ الحق ويجود

© 2024 - موقع الشعر