في العين دمع وفي المعاليق حسره

في العين دمع وفي المعاليق حسره
من راح عني راعي الزين زعلان

يا كسر قلبي ياعرب الف كسره
وشلون ابرضي صاحبي خدر الاعيان

ياليت ياخذني اسيراً بأسره
اهم حاجه رضوته قدر الامكان

من بعد ما كنأ حبايب و اسره
معادنا ذلحين اسره و خلاّن

أي بالله الإنسان طايح في خسره
لو هو خسر مثله على مر الازمان

تمرً كليته منه وازدان بسره
بين الثنايا الحمر في ماضيً زان

كتبت به ابيات ماهيب عسره
يا جعل تفدى له بيوتي بالاوزان

حطيت تحت الياء نقطه وكسره
وخربطت في شوفه قوانين الاتقان

مديت له يمنى واثنيت يسره
وحطيت له في الصدر خيمه وديوان

بنيت لي جسراً بقى جنب جسره
وسويت لي من جزل الاشعار (ديوان)

ماهبت لا صقره ولا هبت نسره
ولا هبت سهم البعد لو كان ما كان

حبه كما لوح تثبّت بدسره
وبعده خذا عقلي وانا ابن قحطان

الشاعر مسعود القحطاني