لبّوح قلبي

ييتك عن تقول ما ييتك
ساهي ولاهي وناسنّك

ييتك بشوق وتمنّيتك
شاري ودادك وشارنّك

ما لي عزا عنك فدّيتك
روحي ولعيون يفدنّك

انت اللي بالحب خصّيتك
لبّوح قلبي مسمنّك

أرخصت دنياي وأغليتك
غالي وغالي ومغلنّك

في بؤبؤ العين حطّيتك
وبرموش عيني مغطنّك

عن نسمة الكوس داريتك
ما أبي النسايم يغثنّك

دقّيت لك ماي وأسقيتك
من فيض ودّي مدلعنّك

تامر عليّه ولبّيتك
ماشي على ذوقك وفنّك

بأصدق الأحاسيس حبّيتك
واليوم ما لي عزا عنّك

يا بلسم الروح يا ليتك
ترحم فوادٍ مودنّك

يا كم (ع) سعّود وصّيتك
بالروف لا تزعّله منّك