يا بو سعد .. شفت علم ٍ ما يسرّ اعداي
جابه هبيل ٍ تصافق جنبه فْجنبه .. !!
مْخالف الشور ويْجاهدني في مبداي
الحمد لله عرفنا علْمه وْ دربه
كانه يحبّ الرّدى .. ويْخالف اهل الراي ..
الخالدي ما يماشي واحد فْسربه
والناس تخبر علومي .. وتْعَرِف ممشاي
الطيّب اعشق علومه .. واشتري قربه
ماني مماشي رديّ الساس واهْل ال(هاي)
كلّ ٍ على هالبسيطه .. يبلش فْذنبه .. !!
في مكرمين اللحا .. شفّي وكلّ رْضاي
والا خويّ الردا .. يا لعنبو كذبه
خلّه يدقّ الطبل .. والا يِعَزْف الناي
خلّه يلاعب جنوبه .. لاطرى غربه ..
والا الشمالي حشمته .. ماهو منّه جاي
يأبى لميلة عقال الحاتمي يشبه .. !!
والشرق فيها بني خالد وكلّ حْماي
هذا الذي يالسنافي .. محْرق ٍ قلبه .. !!
الخالدي لا رضى .. لا تزعلك دنياي
ولْيا زعل .. كلّ جنّ ٍ نمتطي ركْبه .. !!
كلّ ٍ لراعي الوفا يا بو سعد شرّاي
وانته مخيّر ما بين الناس بالصحْبه
واللي حسيبي على ما قلت هو : مولاي .. !!
والله يحاسبْه يومه ضيّع الحسبه .. !!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر