ما بقى بي حيل

مابقى بي حيل يقوى وانتخيه
إنهزم حيلي وانا توّي شباب

تقصر يْديني عن اي شي(ن) أبيه
لو يكون أقرب من زرار الثياب

تظلم بعيني مسرّات وْوجيه
وضاقت بعيني وسيعات الرّحاب

صرت انا السّاهي بعد كوني نبيه
والطّريق اخلف بعد كونه صواب

والسّؤال اللي أقوله بعد ليه
الإجابه ما لها مفتاح باب

والحقيقة بين أسطر ما يليه
ليه أنا عايش بعالم من ضباب

ليه أنا لحالي وحيد بوسْط تيه
والسعاده ليه غطّاها حجاب

ليه روحي عافت اللي تشتهيه
من بعد ماكانت الدّنيا زهاب

ليه حلمٍ من زمان آنا احتريه
جاني لكنّه على هيئة عِقاب

ما أحسّه شي ابد ماله شبيه
غير روحٍ ضاميه تطرد سراب

والخفوق ان جيت اعاتبها يديه
ردّلي بالله وش فود العتاب

عمري ماشي في طريقٍ ما أبيه
والزمن يجري ولا يحسب حساب