صرير القلم

عَرَفت ياهذا القلم من صريرك
إنك تبي تظْهِر لنا ما بداخلْك

لكن قبل تكتب وتمسك مسيرك
‎أنا أعتبرك إنسان حُر بتعاملْك

خذها نصيحة ياقلم من شويرك
‎نسِّق حروفك واكتب اللي يجمّلك

ترى حديثك بالمجالس سفيرك
‎إياك لا ترسِل سفيرٍ يفشّلْك

الناس ماتعلم سراير ضميرك
منطوقك اللي يسمعونه يمثّلْك

بالغالب لسانك يحدد مصيرك
إن مارفع شانك ؛ على الرأس نزّلْك

أنت اتعَرِف نفسك ولكنّ غيرك
‎يَحكِم عليك بمنطقك قبل ياصلْك

إياك لاتكتب كلامٍ يضيرك
‎تبقى رهين لما تخطه بأناملْك

الناس ماتدري عن أعماق بيرك
لهم من الماء مادفق من مسايلْك

وإذا الكلام اللي نقوله يثيرك
‎آسف على قولٍ يثيرك ويزعِلْك

أما قبَلْت و كثّر الله خيرك
وألاّ مجامَل ما أقدر أسكت وأجاملْك

وأنت المخيّر بين زاكي عبيرك
و ألاّ تحمّل مايجي من عواذلْك

عبد العزيز شداد الحربي