متى يقال سهيل

متى يقال سهيل عقب الغبا شيف
وعاض بسموم القيظ حلو البرادي

اقفى ثمر حدب الجريد المهاديف
والبدو تطري شدة للمنادي

واقبل هداد مشقلب الخرب يا سيف
اللي على كيفي وغاية مرادي

نركب على اللي جاهز بالتكاليف
لقطع الفيافي والحزوم البعادي

نبي نوايق نايفات المشاريف
عقب المقيظ وعقب شوف البلادي

واليا وصلنا ماقع فيع اثر صيف
وتشوف فيه اثر الحباري جدادي

سويت فنجال على غاية الكيف
بشبوب رمث من نشانيش وادي

مقيال لين يطرّف الوقت تطريف
مقدار ساعاته ثلاث عدادي

لاجت صلاة العصر قمنا خفاخيف
مستعجلين وشيلنا باجتلادي

وكل نقل طيره وكب السواليف
وصار المعاند بينّا بالمزادي

واليا ركبنا فوق حمر الرفاريف
وكشفت براقعهن بروس الحمادي

هذا جروديّن عديم التواصيف
وهذاك شاميّن كبير الثنادي

وهذا ابيض جثل اليا شيف ماعيف
وهذاك فيه دقوق فارس تنادي

تزبرن مثل الرجوم المواقيف
وكلن يبي ينزع لطلع وكادي

تل السبوق الفارسي عقب توقيف
وراعيه قام بقولة ألزم ينادي

وسقنا وراه وعجنا له عواصيف
ومزهبين سلاحنا بالأيادي

وقّع بحد الروض وافي الأطاريف
وجينا نديره سوقنا بالركادي

وشفنا الحباري وسط روضه محاذيف
عنده ودونه مثل نطل الهوادي

أرقابهن تشدي زنود المزاعف
برق وحدري ريشهن به سوادي

ومالوا عليهن العيال النواتيف
بمطرزات الصنع خضر اجدادي

بيدين مثل أبو حمد مكرم الضيف
عز الصديق وعز من جاه بادي

بالروض ما خليت عقبي تحاسيف
صدنا وطاب الكيف والطير صادي

هذي طرات الكيف يا باغي الكف
والعمر خيره لو بقى للنفادي

وصلاة ربي عد قشع الشفاشيف
على نبي للمخاليق هادي