متى يبين سهيل

يوم اعلن الراصد دخول الكليبين
سهيل من شهرين نبغي طلوعه

العاصمه فيها نذوق ( الامرّين ) 
وحنا بدو ما نعترف فالميوعه

لكن حقيقه يا عرب جوّها شين
وتسيّر الواحد على غير طوعه

دايم هواها مختلط ب الدخاخين
ما لطّف اجواءها مسقّي زروعه

وازعاجها صوت المزامير روتين
وقت الدوام و في نهاية اسبوعه

متى يبين سهيل والخاطر يزين
ونسج فاوسط نجد والا فروعه

يصبح من الماطر ورود وبساتين
لوحة من الماضي واناسه وروعه 

مربا البكار النادارت المزايين
اللي عليها الوصف كمّه ونوعه

والّا ترا الاموال هي و الدكاكين 
لابد يورثها البنادم ( تبوعه )