هب البراد

يو بو حمد جتنا مواسم لياليك
سهيل بيّن والحوايم كثيرة

القيظ راح وما مضى منه يكفيك
والطير عقب ارباطه اطلق جريره

هب البراد وجاك وقت يسليك
زان القنص لأهل الوجيه السفيره

وأنا أطلب المولى عسى الرب يحييك
يا ريف خطاره ومكرم قصيره

ما مل من قربك خويّن امخاويك
ينسى هله وده بطول المسيره

نبي تعلمنا بنوّك وطاريك
متى تبي مقانصنا للجزيره

لا صار ما عندك شطون اتلهيك
يا بو حمد قطع الفيافي بريره

شوف الحباري واشقح الريم يحييك
ونصب الخيام ومجلس بالحظيره

وفنجال اشقر لذته بين اشفايك
يبعد سواهيج الهموم العسيره

واليا قنصت الصبح تاليه جافيك
العصر درّج للفروخ الكسيرة

يا بو حمد فالطير ماني بوصّيك
اتعب على اللي له كفوف كبيره

جثل المناكب مانعي يهقويك
مسروك من بر فارس مطيره

ابيض حمر جثل اليا هيد يشفيك
ليخيشن قدمه حشرهن حشيره

واليا علق خله عسى النذل فاديك
اجلس اوسّع خاطرك بتعميره

زان الطرب والكيف زانت معانيك
في يوم دوق ما تمنيت غيره

بأرض خلا ما فيه دوس ودواكيك
واطيه من هدب السحايب نديره

جت من بكور الوسم ما فيه تشكيك
لين اشبكت ريضانها بالبذيره

تصلح لمن ضاقت عليه المساليك
راعي حلال وحت فيه الذخيره