فياض ونشانيش - سمير بن صليهم

يا بو سعد ينساح فكري وبالي
يوم أنت تطري لي فياض ونشانيش

تذكر لنا خد من الدوج خالي
تقول قفر عقبكم ما بعد نيش

سوالفك مثل الغدير الزلالي
طرايف ما قالها الخبل والديش

للطير والمقناص عندك مجالي
وحنا لهالطاري نفوز ومعاطيش

اسهيل باقي من حسابه ليالي
يا ماحلا ليشيف قبل المغابيش

والقيظ راح ولا بقى له توالي
وقرّب هداد امسخرات ابرق الريش

عقب الندى ذعذع براد الشمالي
وشفنا من الجبلة مزون مراهيش

هبّت ذعاذيع الشتا باحتمالي
صار الشتا سلطان والقيظ درويش

من البرد ما تقعد بوسط الظلالي
جا حل ملبوس الفرا والطرابيش

ثم دعينا طيبين العيالي
وقلنا ازهبوا يا مبعدين المناطيش

البن يحمس والعلايق تشالي
وجا دوركم ياللي تبون المطاريش

والصبح في دبرة عزيز الجلالي
ناوين بالممشى علينا غطاليش

ومرواحنا خد يجيه الغزالي
بأرض خلا ما طبها إلا الأواحيش

أرض خلا ما يمها الزول زالي
إلا الرجوم الحمر والسدر له هيش

ومعنا اشقر جثل عريض جلالي
شر الحباري طايرات ومخاييش

نادر حرار وماكره من جبالي
ودقوق فارس فيه مثل النقاريش

منكب وكف وعين والراس عالي
ومسروك ويقال عار من الريش

قرناس من كثر الهدد ما يبالي
ولا هوب نكال من الدوس لو هيش

يا زين هده في وسيع السهالي
وحنا وراه بعامرات النواتيش

بإيدين سمحين الوجيه الرجالي
الطيبين أهل القلوب الهشاهيش

© 2024 - موقع الشعر