من لا تماكن حاجته

سعيد ينشدني وأنا عنه مشطون
قلبي مصد وذاهب ذيهبانه

مشاغل فكره لعابيب وافنون
وأنا ضميري غادي حرّقانه

مثل الوحش لو ناض بالسبق ممهون
في يد غشيم وأذهبه بكفخانه

لولاي أدواي جرح قلبي بغليون
وفنجال بن عايم زعفرانه

لا مشي مع العربان تايه ومجنون
وأصير مثل غتيم بأول زمانه

يالله ياللي لك عبيد يصلون
يا واضع بيت الحرم في مكانه

يا ناصر موسى على قوم فرعون
يوم انكروا حكمة عصاه وبيانه

يالله تجعل ذر الأجواد يمشون
واعمر بيوت أهل الصخا والديانه

اللي على سلم المراجل يحامون
بدنيا ودين وحافظين الأمانه

وأدمر بيوت اللي على الناس يلغون
أهل النمايم والهجا والخيانه

اللي بزفرات المجالس يلجون
وكل على كيفه يمذرع لسانه

واليا بدالك لازم ما يسرون
مردهم ساس الردى والعفانه

عرق الندى يندى والأجواد يذرون
وعن الوزا فيهم ملاذ وحنانه

وأرض الصبخ لو علّها أنهار وعيون
لا خير فيه وساس قاعه صيانه

خلك بعيد عنه والرزق مضمون
تراه ما ينفعك خضرة اشنانه

واختر مكان العز لو كنت مرهون
في راس حزم غادي صليانه

أخير لك من مقعد الذل والهون
وصبرك على ضيم الدهر وامتحانه

ومن لا تماكن حاجته قبل يمشون
راحت عليه من الكسل والمهانه