ولو يعلم الانسان عن يوم تحت الأرض ؛رمى كل ماتملك يدينه وينفضها - هايف العطاوي

اعيش بخيال وحلم في عالمٍ مكتض
اعاند واكابر في الحقيقه واناقضها

احسب الحياة بطبعها ماترضّك رض
واثرها فرص وإن روّحت ماتعوضها

سبحت بهوى نفسي على بالي أسعد حظ
ترحّب بي أمواج الخطر ومتعرّضها

بداية حياة العمر مابين ضحك ومض
امضي دقايقها والاوقات ما احفظها

تمر النصايح ما استمعها ولا اقبل عرض
ومن قالي بانصحك قلت له رافضها

ولو يعلم الانسان عن يوم تحت الأرض
رمى كل ماتملك يدينه وينفضها

اخفف على روحي وانا داخلي منجض
ياكثر الجروح اللي من الجمر منجضها

صدوف الزمان اللي تقض الرواسي قض
تقض الحجر واخذ العبر من تقضضها

ماهي سنة تحيا ولا هي من الله فرض
لكن الظروف احكام في ظرف تفرضها

تروح اللحى واشنابها ماتسد القرض
وهذي دبرة الايام والوقت قارضها

هايف العطاوي
© 2024 - موقع الشعر