صوت المواطن

لا واهني الي من الدنيا ماطاوله السهر
ولا واهنيك يا لقلوب الي قبلها نايمه

أطوي سباريت الصحاري وان سبحت أسبح بحر
والأرض ماتثبت بدون أوتادها الي قايمه

ماكن عندي في الحياه الحاضرة علم وخبر
ماهي طبيعية ولا هي في النظر متلايمه

الوقت مابه مشكله المشكله ادهى وامر
ضاقت صدور الناس وانت تشوف الاجواء غايمه

حسب طبيعة مجتمعنا ياغناوي يافقر
مابه سوا ومعادله والجهل من عظايمه

صوت الفقير مغيبينه لا يذاع ولا يمر
وصوت الغناوي لا ارتفع قالو مايرحم لايمه

يعاملونك كن مالك في البلد هذا مقر
مالك حقوق ولا لك الا أسعارنا الي حاميه

روّح وصدرك من غبونك فيه نارً من حجر
تمر في صورة خيال الها جروح داميه

صوت المواطن مختفي والشعب واقف في قهر
والمشكله سوء البطانه عاملً ظلايمه

لو ان صوتي ياصل ولاة الامر في هالامر
ان كان حلّت مشكلتنا مالحقنا لايمه

ملوكنا عز الملوك انا ذرا وانا فخر
حكم الشريعه حكمنا فيه الاوامر ساميه

الله مكرمنا بدار الانبياء خير البشر
معطي العطايا لاعطى ماتنحصي غنايمه

هايف العطاوي