مستحيل اسامحه

ضايقٍ بالي وصبري تعدى منتهاه
والهجوس اللي بلقبي خيولٍ جامحه

لها مضمارٍ في الصدر ما يلحق مداه
تجتول فاسطبله الضاويه والسارحه

قاريٍ لي في كتابٍ ما احد قبلي قراه
يتعب الطالب بفهمه ويتعب شارحه

وزبدة الموضوع كما يقولون الرواه
بالعسل ما تنتحلى المياه المالحه

وان جفاني غاليٍ قلت يشفع له غلاه
باتغاضى عنه لو الخطيه فادحه

كل من يخطي عليّ باتجاوز عن خطاه
الا من يكذب عليّ مستحيل اسامحه

من كذب عليّ نزعت من قلبي ولاه
الكذب ما عاد بعده رضا ومصالحه

خلني عنه اتجنّب وهوْ يزحف وراه
المواجه حد علمي ما هوْ في صالحه

باترفّع عنه ما بانزل الى مستواه
لا يصافحني بكفه ولا باصافحه

والوفي طالت حياته ويمال الغناه
معرفته وْ خوتي له تجاره رابحه