اجمل قصيدة حب

الغالي اللي توجّه من ربوع الرياض
يامرحبا ياهلا به في ربوع العقيق

تثمر غصون الغرام ويزهرن الفياض
ويمطر سحاب المشاعر له بعهدٍ وثيق

في مقدمه بارق مْزون المحبين ناض
وْله في خيالي خيال وْ له بعيني بريق

افرش له ازهور وردٍ ناصعات البياض
واشعل عقود الفرح على مدار الطريق

طلّته تحيي كيانٍ قارب الانقراض
وشوفته تزيح عن قلب العنا كل ضيق

له امتلأ القلب من نبع المحبه وفاض
ورويت عروقٍ من اسباب المفارق حريق

ومن الفرح هاجسي له باصدق الشعر هاض
ازخرف اجمل قصيدة حب الاغلى عشيق

نبرة شجون المشاعر في رحابه رياض
وعذب القصايد لغيره فالهوى ما تليق

والمشكله كان فالجيه ما طوّل وراض
وجدد نهار الموادع جرحي اللي عميق

ياصعبها لا نوى يعود صوب الرياض
وخلاني اقاسي انواع الاسىى فالعقيق