اجمل قصيدة حب - مسفر جمعان الصفا

روائع الشعر تطربني معانيها
والقلب ما يستلذ الا بلذتها

اعسف بيوت الغزل واسرج قوافيها
في وصف غيداً تشوق العين شوفتها

في حبها ازخرف اشعاري واغنيها
واشرح لها اسراري اللي ما تناستها

بنات الافكار تدعيني وتدعيها
ولو غابت الفاتنه ما تغيب صورتها

يسرح خيالي وانا عيني تراعيها
واموت مابين وقفتها و مشيتها

الى اقبلت جنة احلامي تباريها
والى ابعدت ماتت امالي برمتها

زعيمة الحسن ما بنتٍ تجاريها
على بنات العرب تفرض زعامتها

بالزين غطّت على الدنيا ومن فيها
تغار من حسنها حتى مرايتها

ما فيه من تشبه إلحضرت معاليها
عن بارعات الحلا تفرق فخامتها

انعم من السندس مْلامس اياديها
تشفي وتبري جروح القلب لامستها

والصوت تطرب له اسماعي ويغريها
واضيع لا داعبت سمعي بضحكتها

والعين من غير كحل الله محليها
يذوب قلبي الى لدّت بنظرتها

والشّعْر لليلٍ على الامتنان كاسيها
والخد بدرٍ تجلت فيه روعتها

والاسم دلّال تزهابه ويزهيها
وياخذ وسامة حروفه من وسامتها

حتى جلكسي حلاوتها تسميها
على اسمها وْبه تفاخر في دعايتها

تغري به عْيون بايعها وشاريها
كن اسمها يْزيد في روعة حلاوتها

اوصافها تذهل الشاعر ما يحصيها
بالذات لا طلّت بْكامل اناقتها

سبحانه اللي على اجمل وصف منشيها
حتى اكتمل زينها واعلى مكانتها

الى رضت طابت الدينا لغاليها
واشوف نور السعاده فابتسامتها

وتضيق لا ضاقت الدنيا باهاليها
ويموت زهر الغلا لا اسقته دمعتها

اهديتها الشوق واهدتني تغليها
ورهنت سعادتي حشمة سعادتها

بالحب ما مثلها في قلب مغليها
وعندي ما يعدل غلاها الا سميتها

انسى حياتي لكن ما ني بناسيها
وْباموت ما ماتت بْقلبي محبتها

© 2024 - موقع الشعر