بطل المسلسل

سيف القصيد البريع الى بدعت اجزله
يْطوّل اشناب قوم وْ يحلق اشناب قوم

بأجرّد السيف من غمده وباجمّله
وباحط به في وجيه اهل الضعافه وسوم

اتحمّل الطيب و اما الخبث ما اتحمّله
وياجعل من يبرك لْحمل الخطا ما يقوم

اللي ما له رايٍ يْدله ولا يْجمّله
وْ في ساقة القافله يمشي بليا عزوم

ماني مطاوعه في علمه ولا اردّ له
ولا ني مرافقه لامن سار خلف الرخوم

راي الخبل ما يمثلني ولا امثله
لا صار جوّه مغطيةٍ قمره الغيوم

واللي قبل راي من رايه دني مأقبله
عليّ ما تنطلي حيلة ومكر الغشوم

وبعض المواضيع تصلح فلم ومسلسله
لادوار متبادله ما بين كل النجوم

وبطل المسلسل وراه اعلومٍ امهوّله
ويبحث عن البهرجه قدام روس القروم

غروه بالمدح ناسٍ حوله مْطبله
ثم جاءْ الافندي على قول العوارف يزوم

سيناريو ما كشف تاليه كود اوله
لو حاول المخرج ايدبلج علينا العلوم

اثر معه غلّةٍ في داخل السنبله
ويبي يحمل ضريبتها جميع العموم

يتوقع الثانيه بتجي كما الاوله
وبيفوز بأم العضود اللي شحمها ردوم

امطمّعينه هل المدات بالمرجله
وسمحان ما يشبع الا من كبار اللقوم

قالوا نبي تعتمد موضوعنا وازهله
واصدر علينا القرار المعتبر ومخدوم

واصدر قرارات مختومه ومستعجله
ولبعضهم معه ظني قسم ظمن القسوم

وان كان مابه حكيمٍ يوقف المهزله
بكره بتاتي علومٍ ما لها اية لزوم