على عهد الغلا باقي

لـ ، ، في الغزل والوصف

المنسابة: هواجس شاعرية

حبيبي يابعد عمري يزين الوقت بوصالك
تعال نعيد حزات الغرام ونقهر الغيبه
على ذاك المكان اللي هدوءالليل يحلالك
انا باقي على حطة غلاك وكل ترتيبه
على عهد الغلا باقي وفي الخفاق منزالك
وطيفك كل ماحن الخفوق اشواقي تجيبه
تعال ان كان لي ذكرى تغذي الحب في بالك
قبل لاتطوي سنين الهجر هالحب وتذيبه
واذا ماتسمح ظروفك نخيت الشوق يسعى لك
يجي لك شوقي الجامح وشوق القلب تدري به
ابيك تقولي وينك اذا درب الهوى سالك
ابركب صهوة اشواقي وستر الليل بسري به
حبيبي قبل لاترمش جفونك شوفني قبالك
يعانقك الغلا ءاللي اذا شفتك امسي به
يسابقني على حضنك حنين بلهفته جالك
وخفاق عقب هجرك ماغير اسمك يهذري به
وعينين من الفرقا تهل دموع ترحالك
قضى ماها عليك وما بقى به دمع تبكي به
وانا ياسيدي منه يخبرني عن احوالك
سوى طيف يصبرني على فرقاك واسلي به
وانا من هالخيال اللي يوقفني على جالك
تعبت وما شفاني هالخيال ولامناديبه
انا ياغايتي ودي اشم العطر من شالك
واعيشك واقع يحكي حقيقة حضنك وطيبه
ابيك تعيش آمالي اذا آمالي آمالك
واذا عندك لمعنى حبنا مقدار وهيبه
ابي من نظرتك اكتب قصيدة فيك بالحالك
والحن شعرها لحن جميع الناس تشدي به
تعال نسامرالقمرا مادام الشوق نادالك
وليل يعزف انغامه على الذكرى نغني به
بوحي
في 1441/2/13هجريه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر