رح تراني مانويت اركـض وراك

رح تراني مانويت اركض وراك
مانويت اغمر شموخي في الوحل

مطري الفرقى قبل طاري لقاك
مابغيت اخدع فؤادي بالأمل

يوم اعيشك قصدي اوصل منتهاك
قصدي اعرف في فؤادك لي محل ؟

كنت واثق من حقيقة مبتغاك
ادري انك بالتسلا ياعسل

كل هذا بس اجاري مستواك
اتجول في طموحك ثم افل

صدقيني لو عطيتيني هواك
كان قلبي توجك تاج الغزل

كان والله ماأبي غيرك سواك
واقتله حب على حبك نزل

وازعل العالم على سبة رضاك
وافتخر في حبنا مهما حصل

واجبر الخطوة على مشيت خطاك
واتبعك لوكان تسكن في زحل

واكتب الأشعار في زاهي بهاك
وانثر الأشواق في احلى جمل

واجعل ازهار الوفا تملا سماك
وارسمك في خاطري بدر كمل

من ينابيع الغلا بسقي ضماك
واكسي ارضك كلها شيح ونفل

لكن انتي من قتل باقي غلاك
في يدينك تقطعي حبل الوصل

اعذريني لو جفيتك ياملاك
سامحيني لو بدا مني زلل

في النهاية ياعسى يسعد مساك
الغريب اليوم قرر يرتحل

خالد في : 1433/01/7 هجري